/ Blogaria: Mikel Bringas / in Iritziak / 3 iruzkin

Nondik gatoz?

Mugiment gizarte aktiboa lortzeko elkarlaneko egitasmoa da. Etorkizuna hobetzeko egitasmoa izanik, oraingo eta aurreko egoera ezagutzea komenigarria da, nora goazen jakiteko nondik gatozen jakiteak lagunduko digu eta. Horixe bera egin genuen Mugiment egitasmoa adostu genuenean, aurreko egoera aztertzen (2018ko lan-programaren 2. puntua).

Jarduera Fisikoaren inguruko daturik garrantzitsuena pertsona aktiboen kopurua da. Datu hau ezagutzeko dugun iturririk nagusiena euskal osasun inkesta izanik, horren aurreko argitalpenak aztertu ditut.

Lehenik eta behin argi eta garbi utzi nahi dut egingo dudana ez dela zuzena, itxuraz neurtutakoa ezberdina izan baita urtearen arabera. Muga hauek izanik ere, datu guztiak zaku bakar batean sartzen saiatuko naiz.

Aurreko sarreretan adierarazi dudan bezala, osasun inkestan deigarria da datuen azalpenetan erabiltzen den hiztegia, emaitzen interpretazioa eta nazioarte mailako beste ikerketa batzuekin alderatzea zailduz. “jarduera fisikoa”, “sedentarismoa”, “ariketa fisikoa”, “inaktibitate fisikoa” eta antzeko hitzen erabilera ez da jarduera fisikoen adituek ematen dietena, eta gainera ezberdina da inkestaren urtearen arabera. Beraz, udareak sagarrekin nahastuko ditudan arren, azterketa egingo dut.

Aztertu dudan lehenbiziko inkesta 1992koa da. Bertan aipatzen da 1986ko datuekin alderatuz aldaketa handirik ez dagoela, baina 1986ko datuak aurkitzeko gai ez naiz izan.

1992an, 1997an, 2002an eta 2007an inkestetan aisialdia / ohiko jarduera-ren arteko bereizketa egiten da. Ohiko jardueretako aurkitu dudan informazioarekin ez naiz gai inaktibitatearen inguruko daturik emateko. Horregatik, urte horietan “sedentario” izendatuta ez diren beste guztiak hartu ditut aktibotzat, baina argi izan behar dugu aisialdiaren inguruko datuak direla.

2013an eta 2018an, IPAQ galdetegia erabili zen eta beraz, eskainitako informazioa bestelakoa da. Urte hauetan, azken 7 egunetan jarduera fisiko moderatua edo altua egin zutenak hartu ditut aktibotzat.

Eta hauexek dira inkestetako datuak (portzentaiak):

emakume aktiboak gizon aktiboak orokorra
1992 (a) 23,0 39,0 31,0
1997 (a) 39,5 47,1 43,1
2002 (a) 31,3 39,8 35,4
2007 (a) 42,8 51,5 47,0
2013 65,2 73,7 69,3
2018 73,5 80,1 76,7

Datu hauek hasierako irudian erakusten dira.

Ondorio sendoak ateratzeko gai ez naiz, esan bezala itxuraz neurketetan aldaketa handiak egon direlako. Agian horixe da garrantzitsuena. Euskal osasun inkesta datu iturri garrantzitsuena izanik, bere ahalmen osoa aprobetxatu beharra dago eta horretarako hobekuntza guztiak proposatu behar ditugu. Landuko dugu.

Etiketak:

3 iruzkin

  • Kaixo Mikel,
    gaur bertan, Unibertsitateko eskola saio batean, datu hauek ekarri ditut hausnarketarako. Nire eskerrak ere bertan idazten duzuonoi, hauxe ere informazio iturria bada gure ikasleentzako.

    Kontua da, AKTIBO, INAKTIBO, SEDENTARIO, JARDUERA FISIKO, ARIKETA FISIKO eta termino hauek ezartzerakoan, nire uste apalean, oso baikorrak dira, urte hauetan asko igo ditugulako, baina bestetik, oso kantitate eta kalitate gutxirekin, pertsona bat aktiboa dela esaten dugulako.

    Ez da ezer leporatzeagatik inolaz ere. Ziurrenik OME (OMS/WHO) gomendiak jarraituz, eta egiten dugun jarduera fisiko kantitatea kontutan harturik, gazte batek 10’ko eguneroko oinez egindako desplazamentua eta bere asteko HF klaseak (60′-90′), gehi agian eskolaz kanpoko jarduera batekin, egia da AKTIBOTZAT jotzen dugula, eta nik uste ausartagoak izan beharko ginatekela.

    Ume batentzako eguneko ordu bateko mugimendua, gainontzeko 6-8 ordu eserita edo pantaila jarduerekin egoten bada, niretzako ezin dugu onartu ume aktibotzat. Nahiz eta osasun ikuspegitik, % handia murrizten duela bere morbilitate eta mortalitatea.

    Mikel Izquierdok esan zuen hitzaldi batean: es cierto que las recomendaciones de la OMS en cuanto a movimiento son a nivel mundial las que permiten evitar en porcentajes “aceptables” riesgos para la salud, pero en realidad es como si a un cerebro con plenas capacidades, le mandamos hacer círculos con un lapicero”

    Hala ere oso interesgarria, zalantza barik.

    • Mugiment idazkaritza teknikoa

      Bat nator esaten duzunarekin, baina bestalde, kirol mundutik gatozenon iritzia eta errealitatea ez dira benetan inaktiboak direnena bezelakoa, eta guretzat oso gutxi dena beste batzuentzat asko da. Niri ere iruditzen zait datuak agian baikorregiak direla, baina aintzat hartu behar dugu inkestetatik ateratako datuak direla, eta inkestetan erantzuten duguna eta benetan zenbat mugitzen garen ez datoz bat. Gutxienez 3 azterlanetako datuak berdintsuak dira, eta hori nire ustez positiboa da. Bide batez, laster webgunea aldatuko dugu, eta bertsio berrian sarreretan iruzkinak jartzeko aukerarik ez da egongo, baina ateak zabalik dituzu blog honetan zure iritzia plazaratzeko sarrerak idaztera animatzen bazara. Bukatzeko, pozgarria da jakitea hemen argitaratutakoa erabiltzen ari zaretela.

Utzi erantzuna